|
 |
Nitayaaksistotoohsspinnaan
Aiksistatsimoihkasawa nitsitaohkanayaakssistotoohsspinnaan. Ipanssayi ponokaotokis nitsistotoohsinnaanistsi ihta'paistotsi'piawa.
Ninaiksi ki saahkomaapiiksi aisttohksisoka'simiiyawa, iitaitsiiyawa ki itayo'kimaa'tsiyawa. Nimattai'tsitsikinihpinnaan. Aakiiksi ki aakiikoaiksi ni'tsii asoka'simi aisapskaohsiyawa. Mattaisahksikanssiyawa ki iitai'tsitsikiniyawa.
|
 |
Istohksisoka'sim
Otsinanskaan Glenbow Museum
Aakiisoka’simi
Otsinanskaan Glenbow Museum
|
 |
|
 |
Nitaotspinnaan
Ninaiksi aohkanaotootsiipiiyawa saahkomaapiiksi. Iimakomaisstoyiisi, mattaotootsimmiawa. Nitsiikohtayisspinnaan. |
Amato'simaani
Iipisowaahsiiyi aisaisskapisi pinaapohtsi, iitaomatapihtsiwa mo ksiistsikoi. Miistsi isstsiistsi nimohtao'tak sakiaiksistoyi nitsitsitaohto'p nitsitawaatowa'psspinnaani. Sipatsimoyi nimohtsitawaamto'sim. Aitohkanayiisi moi si'tsii iitawaatoyiistotsi'p nookonnaani. Ni'toi nitsitapiiminnaaniksi. Ninaiksi
Iitawaatoyiinihkiyawa iitaiki'tsimiiyawa naato'si maahkspihtsissi naahkitssoksiksistsikomsinnaani. Nitaohkanaikkskopihpinnaan awaatsimoihkasawa.
|
 |
|
|
Nitaya'kihkiniihpinnaan
Ninsstsinnaaniksi aya'kihkininniyawa ki iitaippotsipistomoyiiyawa i'naksstssimmiksi. Niksisstsinnaana aya'kihkininniwa ninnaan o'tokaani ki ostoi noohkattsitaippotsipistawa.
Nitaakiiminnaaniksi aisto'kayi otsippotsipistaanowawaistsi.
Tokskammiksi ninaiksi aitotoisapa'kihkiniiyawa otsitapiimowawaiksi tsahtao ni'toi otakkaamowawaiksi.
Tokskammiksi ninaiksi aohkinayo'siyawa mo onskiowawaistsi iitayissistsiyawa. Ihtaissksini'p otsinaimsskainaysawa.
Niokskaippotsipistaani ihtainikato'sato'p iyookskaohkawayo'si (Piikani, Kainai, ki Siksika) |
|
|
|
|
Iiko’siiksi
Iiko'siiksi aissksinima'tsiyawa oko'sowawaiksi moi stohkanao'totama'pii. Maataiksisstsspommoyiwaiksawa oko'sowawaiksi. |
|
|
|
|
Poisskinaksini
Nitaohpoisskinotspinnaan kanaiksistsikosi. A’saani nitsitapiiminnaaniksi tsahtao naahsinnaaniksi nimohtaohpoisskinokinnaaniawa. Mostsissk a'saanistsi ihpawa'sokohtoohpiawa issii. Nimohtawaatoyiistotootspinnaaniawa. Ihtsaawai'tsi noisstosinnaanistsi mo niiposi ki ihtswaihkitsiiyawa mo isstoyiisi.
|
 |
Winhold Reiss,
Big Bull in sacred headdress,
n.d.
Otsinanskaan
Glenbow Museum
Winhold Reiss.
Double Steel and Two Cutter,
n.d.
Otsinanskaan
Glenbow Museum
|
|
|
|
Naanistaoihpinnaani
Isstsiiwa'sini aawa'sokohpattsiip iitai'takomatapohpakoyittsiwa. Iitaisspototao'p.
Kamsaawakao'si miistsiistsi nisskaninnaaniksi iitaotohkatayawa iitaotoohkohtayawa. Niksisstsinnaana iitawao'ksisakao'siwa ki nitsitayiisookinnaan kayii, miini ki mookimaani . Nitawattaisspommohsspinnaan. Otsitsisttso'kinihpi matapiwa iitaoyiwa.
|
 |
Sootsimaani
Otsinanskaan
Glenbow Museum
|
|
|
|
